Galiza

Por unha Galiza para a clase obreira

By 27 junio 2020 No Comments

Convócanse as eleccións ao Parlamento de Galiza para o 12 de xullo, cando aínda non rematou unha gravísima crise sanitaria. E fano sen as debidas garantías para a saúde de quen vaia votar ou atender as urnas. Así o decidiu o PP, e así llo consentiron as demais forzas parlamentarias, demostrando o que valen para todos eles a “democracia” e a saúde do pobo.

A xestión da pandemia polo Goberno PSOE/UP-PODEMOS e a Xunta do PP provocou a morte de máis de 600 galegas e galegos, vítimas dos recortes e a criminal privatización da sanidade pública e dos coidados dos maiores.

Máis do 30% da poboación activa de Galiza está desempregada. Máis de 400.000 traballadoras e traballadores están no paro ou afectados por un ERTE. Logo de tres meses de medidas económicas que, segundo a ministra de traballo, “non ían deixar ninguén atrás”, milleiros de traballadores en ERTEs de forza maior, seguen sen cobrar un can, non perciben o que lles corresponde e non saben cando recuperarán os ingresos perdidos.

Mentres anunciaban por televisión, “prohibido despedir”, milleiros de traballadores e traballadoras galegas, sobre todo mozos e mozas, ficaban sen os seus empregos eventuais ou nas ETT, dun día para outro, e sen dereito a nada. Prohibido despedir? Que llo digan aos de Alcoa e auxiliares en San Cibrao, ou aos de Malasa en Ferrolterra, ou aos de centos de empresas que anuncian peches e EREs por toda Galiza.

Estamos ante unha nova crise cíclica do capitalismo que a pandemia do COVID-19 acelerou, pero que xa se anunciaba nos meses anteriores. Crise que aproveitarán para intentar impoñer novos sacrificios á clase traballadora, para que os ricos sexan aínda máis ricos, agora en nome da “reconstrución” da economía.

Aquí, durante tres mandatos o executivo do PP xestionou os negocios das grandes empresas a costa das necesidades básicas dos traballadores galegos. Recortes continuados na educación, na sanidade, e nos servizos sociais liquidaron milleiros de empregos e aumentaron a precariedade e a pobreza do noso pobo. As privatizacións dos servizos públicos e a permanente enxurrada de cartos cara aos petos do empresariado engordaron as fortunas dos máis ricos, mentres medraba a desatención das necesidades populares. Núñez Feijóo e o PP, sempre atentos a servir os seus amos, e cumprir os mandatos da UE, seguiron destruíndo os sectores produtivos de Galiza, tanto na industria, como no agro ou no mar.

A clase obreira e os sectores populares necesitan un programa e unha organización política propia. Un programa e un Partido Comunista para avanzar na recuperación dos dereitos arrebatados e na conquista de novos dereitos sociais, económicos, políticos e culturais, polo pleno emprego, pola soberanía industrial, enerxética e agraria do país, pola ruptura coas estruturas e alianzas imperialistas internacionais, económicas, políticas e militares.

  • Polos nosos dereitos laborais.

  • Por uns servizos públicos para o noso benestar e non para enriquecer as grandes empresas.

  • Por unha vivenda digna.

  • Pola recuperación da produción, do agro e a industria.

  • Para que o noso país non siga a baleirarse.

  • Pola nacionalización dos sectores estratéxicos da economía.

  • Por unha economía planificada para satisfacer as necesidades do pobo traballador.

  • Polo poder para quen producimos toda a riqueza e aseguramos co noso traballo todos os servizos.

Porque só o pobo salva o pobo, para construír unha Galiza para a clase obreira:

Vota Partido Comunista dos Traballadores da Galiza.